De Trifft

Bi de Generaldeelung stell man fast, dat de Dörper Wist un Glüsen veel to dicht an Töst lingen dän, un Töst nich genog Land üm dat Dörp kriegen kunn. So kreeg Töst noch een grodet Gebiet südwestlich von Wist, dat Gebiet geiht bet öber de Wümm’ bet int Mauer rin. Hüüt heet wie dat Gebiet Tostedt-Land. Dat wür ierstmals 1926 besiedelt, later güng dat langsam wieder. (Heft, Hermann u Erika 2004) Hüüt wohnt in Tostedt-Land etwa 100 Minschen. Dormit de Töster Burn nu gaud mit jüm ehr Käuh na de Wümm’wischen kommen kunnen, geev dat von Töst eene Trifft dörch dat Wister Gebiet. De Trifft fangt in Töst an mit de Trifftstraat, geiht denn up de jetzigen Asphaltstraat üm den Düvelshöpen rüm, geiht öber de Straat von Wist na Quellen, geiht denn achter den nee’n Wister Sportplatz un denn öber den Stockenweg röber, Achter de ehemalige Tailee (Ziegelei) vörbi, geiht denn twüschen Sandkuhl un Kauers Wittmauer hindörch gegen de Napoleon-Chaussee, hüüt B 75. Neben de Chaussee is ja de Chausseeputt, de Utschachtung för den Chausseedamm, dor geiht de Trifft südlich an längs bet nan Huthschen Weg. Nu geiht de Trifft den Weg langs bet in dat Töster Gebiet. De Trifft von Stockenweg bet an de Chaussee ward hüüt noch nutzt, denn dor staht nu ja dree Hüüs. Weil nu Generationen von de Töster Burn de Trifft nich miehr nutzt häbt, dröff de Wister Anlieger se unentgeltlich nutzen, de Töster weuern ober keen Eigentümer von de Trifft.

Wo Mauer is, geev dat wenig Steen, so geev dat in Wist keenen Burhoff mit eene Felssteenmuur, wie dat veelfach in annere Dörper üblich weuer. Ok Steen taun plastern geev dat hier nich, so feuhrn us Burn in de Gegend von Dreest (Drestedt) um Plastersteen tau holen, wenn se ehrn Hoff oder ok Straaten plastern wulln. Ok de Plastersteen för de Napoleon-Chaussee för Wist un westwärts würn ut de Gegend von Dreest holt. Trotzdem is de Gegend dor hüüt noch steenrik.


Vorherige Seite *** Nächste Seite