De groden Mauern

Mit Wist westwärts fangt de groden Mauern an. In Wist wür dat Grode Mauer, an de Straat na Verloh, (Vaerloh), 1976 ünner Schutz stellt. Üm 1900 harn de Burn sik öberlegt, wenn se so wieder Törf graben dän, denn blivt för de Kinner oder Enkel keen Törf miehr öber, also häbt se in alle lütten Mauer den Törf afgravt, ehe se dat urbar makt häbt. Dat weuer in Wümm’ an Abensermauerweg, Inlohs Mauer, Tieten Grafel, Tees Bülten, Heins Kalbersbleek un Schmedsmauer in Vörstocken. Schmedsmauer hät den Namen daher, weil dor de Töster Schmed, un ok naher de Wister Schmed, at dat den geben dä, Törf för de Esse gravt hätt, denn dor weuer de beste Törf von allen Mauern. Ok Kauers Wittmauer hür taun affgraben. Dat Mauer wür 1984 ünner Schutz stellt. Dat Kerngebiet wür von de Behürde upköfft, weil dat so wertvoll weuer. Dor waßt de Lungenenzian un in groden Flächen de Mauerlilie.

1838 weuer de Generalteilung, bet dorhin gehür de Vogtei Töst alleen un man kann ok sängen keenen. (Bauk IV, Siet 8) Aber nu wür de Vogtei up de eenzelnen Dörper verdeelt, je na Dörpgröt. Bet dorhin gehür de Otterbarg nich tau de Vogtei, den Barg harn de Herzöge sik at Jagdgebiet vörbeholen. Nu aber wür ja Riepshoff up’n Barg un Otter wür dicht an Barg, so müß de Otterbarg ok mit verdeelt warn. Intwüschen wür aber von dat Herzogtum na Abzug von de Franzosen 1815 dat Königrik Hannober entstahn. 1838 weuer Ernst August König in Hannober. Ob de nu up sienen Andeel nich verzichten dröff oder nich wull, weet keener; jedenfalls kreech he een grodet Gebiet, un dat weuer dat Mauer an de Grenz an de Vogtei Rotenborg. Dat Mauer heet in Westen Rieper Mauer, im Norden Eckel Mauer. In Süden Hamm Mauer un in de Mitt Grodet Mauer. Nu kreech de König dor een grodet Gebiet un heet nu Königsmauer, dat tau de Gemeen Wist hürt. Königsmauer wür af de twindiger Joahrn det vergangenen Joahrhunnerts upsiedelt, (Heft: Hermann un Erika 2004) nadem eene Mauerversök-wirtschaft har den Grundstock legt. (Bauk IV, Siet 200) 1953 harn wi noch vör de Kinner in Königsmauer eene tweeklassige Schaul baut. Ober am 1. Mai 1957 wür Königsmauer eene eegene Gemeen mit knapp 1000 ha von Wist un etwa 400 Personen. Bet dorhin weuer de Fläche von Wist tau 65 % ut Mauer.


Zurück zur Einstiegsseite "Geschichte" *** Nächste Seite